Escritor e xornalista , traballou na banca comercial e na Adega Terras Bendaña. Traballou para RNE, Radio Noroeste, Radio Faro-Cadena Ser e GaliciaDigital. En televisión colaborou na comarcal Televinte. Colaborou desde a mocidade en El Progreso como correspondente. Colabora coa revista poética Xistral. Cofundador e directivo do colectivo Poetas da Ribeira Sacra, foi fundador e directivo da Asociación Cultural e Gastronómica Luso-Galaica e membro da Fundación Amigos de Galicia. É coordenador do premio Moncho do Pío e do certame poético Xohán de Requeixo. É cofundador e actor do Centro Teatral Faro-Miño de Chantada. 

Naceu na primavera, nun mes de maio atipicamente frío. Foi unha nena loura de pelo sempre despeiteado, que ambientaba o seu medrar entre Sarria e Barbadelo. Estudou nesta mesma vila ata que decidiu marchar a Lugo e formarse para ser mestra. A vida é máis luminosa dende que comparte escolas e aulas coas crianzas. Considérase moi afortunada de poder dedicarse á profesión máis fermosa que existe. E entre lección e lección, cóanse algúns versos que lle gusta ir coleccionando. Sen pretensións, intenta admirar o extraordinario do cotiá, espremer as cousas máis sinxelas e sintetizar esencias en palabras. Unha mestra, que, coma todas, é un pouco de todo.

Nada na Terra Chá, na actualidade vive en Lugo. É licenciada en Filosofía e Historia, escritora, historiadora e investigadora da cultura celta, entre outras. Traballa para Fundación Ángel Argivot en Barcelona, como Investigadora das culturas antigas. Impartiu conferencias en Barcelona como parte do seu traballo. Colabora con Xistral, revista de creación poética de Lugo, fundada polo escritor Chairego Manuel María. Defínese como “Unha muller sinxela e con un amor profundo a terra e aos seus. No traballo entregada a súa investigación das culturas antigas”.

Licenciada en Filoloxía galego-portuguesa pola USC, traballa como normalizadora lingüística no Servizo de Publicacións da Deputación de Lugo. Defínese a si mesma do seguinte xeito: “Son unha militante soñadora de mundos fantásticos onde conflúen personaxes da realidade máis próxima e do universo onírico. Desfruto das conversacións sabias, tolerantes e profundas por enriquecer o meu minifundio interno de ideas. O sosego procúroo na calidez do fogar construído de recordos e vivencias do día a día, onde o arrecendo a café e a brisa mariñá me envolven e inspiran para crear, vivir, ser e estar neste lugar chamado Mundo”.

Desenvolveu diversas tarefas na divulgación da cultura galega en Cataluña. É autor de diversas publicacións de historia, ensaio, teatro, literatura infantil e sobre a simboloxía románica na Ribeira Sacra. Tamén é crítico de arte e literatura, conferenciante e articulista en diversas publicacións de Galicia, España e Portugal. Especialista na literatura de expresión portuguesa en África, e autor de antoloxías poéticas de Portugal, Galicia, Mozambique, Angola, Guinea-Bissau, Macau e Brasil. Tamén é antólogo e tradutor. A súa obra está composta por máis de cincuenta libros publicados en galego, portugués e catalán.

Licenciada en Filoloxía Galego-Portuguesa pola USC, traballa dende hai trinta anos no Servizo de Tradución da Xunta de Galicia, onde revisa e traduce ao galego ou castelán todo tipo de textos. Esa experiencia deu paso a unha paixón persoal que cultiva dende hai moitos anos: a tradución literaria, dando voz en galego a autoras e autores como Marguerite Yourcenar, Jules Verne, Hugo Pratt, Mona Chollet, Joao Manuel Ribeiro ou Fernando Casaca, e vertendo do galego a outras linguas a autores como An Alfaya, Xesús Manuel Marcos ou Concha Blanco. Tamén escribe libros, moitos deles para nenos e mozos, e outros para adultos.

Filla e neta de emigrantes galegos. Na actualidade vive en Lugo, onde en 2020 exerceu na EEI Fingoi de Lugo e dende 2022 é profesora de educación secundaria. A terra familiar é Navia de Suarna, de onde é seu pai, de onde son os avós, e de onde é tamén o seu home. No eido literario, publicou “Intraguerras” (Urutau, 2022), e acadou algúns galardóns como o Certame de Poesía María Mariño, o Certame de Poesía Avelino Díaz, o Premio de Poesía Florencio Delgado Gurriarán ou o Premio Arume de Poesía para a infancia. Ten colaborado no xornal Nós e na revista Xistral.

Artista multidisciplinar, tén ás súas costas varias exposicións de cadros, tanto óleos como acrílicos, en diferentes lugares de Galicia e do resto de España (Madrid, Portomarín, Ourense, Lugo,etc.). É membro do grupo creativo Os Nabos de Gracián, e colaborador do grupo cultural Nós. Tamén conta con varias ilustracións de libros xa publicados (“Minia, amor doe”, de Estévez;  “O pracer da chuvia”, de Manuel Vázquez, “A través da miña pel”, de Sonia Melón...).

Profesor de Primaria e Secundaria na especialidade de Filoloxía. Mediador con menores no ámbito educativo. Profesional certificado en Persoas Altamente Sensibles. Autor de diversas publicacións individuais, participou en máis de 40 libros colectivos. Foi prologuista en varias obras poéticas, xurado en varios certames literarios, membro fundador da Irmandade Poética e Artística Galaico-Lusa, e vogal na Asociación Cultural Caldaloba. Colaborou na revista do Centro Galego de Bos Aires. Colabora co GT PAS Lusofonía e Relações Internacionais & Nova Águia – Revista de Cultura Lusófona; coa Revista Nós; coa Revista Cairón e coa Revista Xistral.

A boca de novembro alertou nos meus ollos a súa primixenia fractura. E a Chaira foi o manancial do que recibín os primeiros grolos dese líquido enigmático chamado vida; onde a papados lentos vou aprendendo a amar esta Matria do desacougo, aleitado pola foula da terra e o sorriso incipiente do orballo, que me contaxiaron a través da delicadeza sanguínea dos meus pais esta enxebreza inmaterial da lingua que me constitúe e que me define. E aquí sigo tentando non pasar de balde, mentres observo como a fraxilidade da luz tronza sobre a memoria das árbores que termaron do canto do cuco máis aló de tódolos derregos de abril nesta república literaria de Banxoi. 

Nacida en Corme, trasladouse ós catorce anos á Coruña. Algúns dos seus poemas viron á luz na revista Xistral de Lugo, no Anuario Brigantino, Ferrol Xurídico, no xornal El Correo Gallego…  Colaborou no diario Galicia Hoxe coa súa sección semanal “Cartas boca arriba” e asina a páxina cultural “O Dereito e as Humanidades” na revista Fonte Limpa, publicada polo Colexio de Avogados da Coruña, ó cal pertence. Actualmente é a secretaria xeral da Asociación de escritoras e escritores en lingua galega e forma parte da equipa de Medulia Editorial. Conta con diversos premios e publicacións desde o ano 2006.

Avogada e funcionaria, a poesía leva presente na súa vida dende os seis anos cando comezou a participar en diversos certames poéticos e narrativos acadando o longo de todos estes anos numerosos premios a nivel estatal, principalmente no xénero lírico. Namorada da natureza e do medio ambiente, e cunha profunda conexión co espiritual, a súa obra atópase marcada de metáforas literarias, achegando á realidade natural unha visión mística sobre os sentimentos, a vida e o transcorrer dos anos. Asidua de eventos de micro aberto e recitais de poesía, non imaxina a sua vida sen tinta e papel.

Con cinco anos tivo que abandonar o seu pobo por mor da construción do encoro de Belesar. Foi un acontecemento que marcou moito a súa vida. Alí fican as súas raíces asolagadas polos ríos Miño e Loio. Actualmente reside en Sanmartiño de Guillar (Outeiro de Rei) Lugo. Publicou dous libros de poesía, “Camino de estrellas” e “O laio das Pedras”, e acaba de saír á luz “ La Voz del Silencio”. Colaborou na revista da Irmandade da Sta. Marta de León. Participou en publicacións colectivas como “Mesturas”, “Manuel María”, ”Xistral” e en varias publicacións hispano-portuguesas.