Graduado en Dereito pola UNED, actualmente está finalizando o Máster de Acceso á Avogacía. Como poeta, escribe de maneira espontánea e persoal como unha forma de gardar na memoria e na retina imaxes que lle impactan. Baséase na observación do entorno dunha pequena aldea de Láncara, lugar natal da súa muller. 

Mestre xubilado, reside en Viveiro dende 1982. Premiado nos certames de poesía: Meigas e Trasgos de Sarria, Concello de Vilalba (en tres ocasións), Rosalía de Castro de Barcelona... e en  xornalismo: Reimóndez Portela (A Estrada) e Begonte e o Nadal (tamén en tres ocasións). Autor dos poemarios: Memoria e soño, Nas varandas do abrente, Ás catro augas, Linguaxes e Outras linguaxes  En poesía infantil publicou Recreos , Xiz de cor, Farrapos de nube, No cubil da lúa, Un niño no xardín, Chafarís, Gaiola aberta, Calendario poético e Máxica lúa.

De familia chantadina, é crego na bisbarra de Lourenzá, na Mariña lucense e en parroquias de Abadín. A súa poesía foise centrando no eido relixioso cristiá. As primeiras mostras publicounas Grial (1970) e logo na Escolma de poesía galega de Xosé Lois García (Sotelo Blanco. 1984). Apareceron logo medio cento de himnos litúrxicos no Diurnal da Liturxa das Horas en galego (1999). En 2007 algúns poemas na escolma “Os ríos pasan cheos de Deus" (Toxos Outos), de Victorino Pérez Prieto. No 2000, o libro sobre a fe cristiá co  poema "Profecía dun capitán Trono" (Sept, Vigo), e en 2020 na mesma editora "Oda a Xesús Cristo. Credo e  Camiño”.

Licenciado en teoloxía bíblica en Deusto. Monxe en Samos (12 anos), párroco por Abadín (18 anos),  Educador-terapeuta de drogodependentes en Proxecto Home. Actualmente casado, volve exercer actividades como cura con algunhas limitacións e é Delegado de Pastoral Rural na diocese de Mondoñedo-Ferrol. Admirador e seguidor de Xesús de Nazaré, séntese debedor comprometido do rural galego, e ao redor destas dúas realidades ten escrito unha ducia de libros, nos que aparece a maioría do seu labor poético.

Mestre xubilado, compaxina a escrita co activismo cultural. Gran defensor da súa terra, Navia de Suarna, e dos Ancares. Home comprometido coa defensa da nosa lingua, das nosas tradicións e da nosa cultura en xeral. Ten publicado máis dunha ducia de libros para nenos e nenas e para público adulto. Ten participado, a maiores, en máis de medio centro de publicacións colectivas de narrativa e de poesía. Dende o ano 2019, é o coordinador de Xistral, a Revista Lucense de Creación Poética que edita a Área de Cultura do Concello de Lugo. Integrante do dúo poético-musical ConVersoS.

Gandeiro e poeta en lingua galega. En 1977 publicou o seu primeiro poemario, "Poesía dun labrego", primeiro libro publicado pola Editorial Alvarellos. Desde entón, en poesía, ten publicado “Bricnas”, “Nos cumes do cántico” e “Nas portelas de memor0ça”; en ensaio, “No medio da treboada e “A carón da lareira”; e, en dixital “Haikus galegos”. Ten participado nunha ducia de libros colectivos.

Foi profesora de Ensino Primario e Secundario (Lingua e Literatura), exercendo tamén de poeta, narradora, ensaísta, articulista, conferenciante e traductora. Formou parte do colectivo de renovación poética Cravo Fondo (1977), presidiu a Fundación Rosalía de Castro e foi membro do Consello da Cultura Galega. Ten no seu haber premios nos distintos xéneros e é colaboradora habitual de revistas de poesía. Na actualidade, conxunta nas redes imaxes propias e pequenas pezas literarias. 

Graduada en educación social e no máster de profesorado pola Uned, especialidade de Intervención Sociocomunitaria, exerceu como profesora de F.P. e educadora social. Actualmente, estudaTraballo Social na Uned, á vez que exerce como educadora, manténdose en contacto coas persoas (nenos, adolescentes, 3ª idade...) das que aprende e se sinte inspirada para crear poemas a través dunha ollada máis fonda da realidade.

Publicou poesía, narrativa e ensaio rompendo os límites dos xéneros. Deu mostras poéticas nas obras Estraña estranxeira, Un mundo de mulleres ou Lobo amor e narrativas en Vermella con lobos ou Atracción total. É editora de obras de poesía e autora de ensaio, tradución ou ilustración de poesía. A súa creación inspírase no amor, na liberdade e na loita humana contra a opresión. É autora de Alba de mulleres ou “Lugo, atracción total”. 

Gandeira con explotación propia; poeta. Presidenta-fundadora da Asociación de Mulleres Rurais Landra (Taboada) e Creadora do evento cultural “Ruralsía”. Escritora en libros,  revistas e  Internet. Gañadora  do Certame Cartas de amor, Vila de Quiroga (Categoria senior). Membro de Recolectoras Memoria e Terra. Autopublicou “Algo de mí con mucho de ti”, “Latexos dunha labrega”, “Pintasías”, “Sentidos nunha aldea” e “A.M.A en esencia”, con dúas amigas.

Cultiva a poesía desde novo, xénero que acabará complementando coa narrativa, o ensaio e a tradución, maiormente literaria. Como conferenciante e traballador puntual en normalización, adicou moito tempo á defensa da lingua do país, onte e hoxe en precario. En A luz co tempo dentro (Galaxia, 2023), atopará o lector un a modo de reflexión memorialística sobre a súa traxectoria vital, profesional e creativa.

Reuniu a súa poesía erótica e civil en Amores e clamores e a poesía visual en Cinepoemas e Corpoética. Está traducido a numerosos idiomas e o seu poema “A cabeleira” publicouse en máis de 80 linguas. É autor dun cento de obras narrativas, teatrais e ensaísticas e recibiu diversos recoñecementos en Europa e América. Dirixe a Cátedra Valente da USC e deu clase en Nova York, Bretaña e París, lugares aos que dedicou poemarios, como antes dedicara Lugo blues á súa cidade natal. 

Nada na cidade de Lugo o día de Nadal de1973, e oriunda de San Adriano (Lourenzá). Xurista de profesión, cunha larga traxectoria como Xuíza e Avogada. No 2023, publicou o seu primeiro libro de poesía, en castelán, que leva por título “Llegarás (entretanto es tiempo de vivir y/o malvivir)”.